कल्याण दि.30 मे :
कोरोनाबाधित रुग्णांवर उपचार करणाऱ्या आरोग्य कर्मचाऱ्यांनाही त्याची लागण होण्याचा मोठा धोका असतो. मात्र त्यावर उपाय म्हणून केडीएमसीच्या कोवीड रुग्णालयात ‘कोरो’नावाचा रोबोट रुग्णांची सेवा करणार आहे. डोंबिवलीतील प्रतिक तिरोडकर आणि त्याच्या टीमने बनवलेला हा रोबोट खासदार डॉ. श्रीकांत शिंदे यांनी नुकताच केडीएमसीकडे सुपूर्द केला. यामुळे कोरोना बाधित रुग्णांना वैद्यकीय सेवा देणाऱ्या परिचारिका आणि आरोग्य कर्मचाऱ्यांना असणारा कोरोनाचा संसर्ग टाळण्यास मोठी मदत होणार आहे.
डॉक्टर्स, परिचारीका तसेच वैद्यकीय कर्मचारी कोविड-१९ बाधित तसेच कोरोना सदृश्य रुग्णांवर उपचार करत असताना त्यांना सुध्दा कोरोनाचा संसर्ग होण्याचा सर्वाधिक धोका असतो. यावर उपाय म्हणून अत्याधुनिक तंत्रज्ञानाचा वापर करत डोंबिवलीतील प्रतिक तिरोडकर आणि त्याच्या टीमने विकसित केलेला रोबोट कल्याण डोंबिवली महापालिकेला देण्यात आला.
रुग्णालयतील एक कर्मचारी एकाच ठिकाणी बसून कोरोना रुग्णांच्या संपर्कात न येता या रोबोच्या माध्यमातून रुग्णांना वेळच्या वेळी ओषधे व इतर आवश्यक मदत पोहोचविणे, थर्मल टेस्ट घेणे, रुग्णाला निर्जंतुक करणे तसेच रुग्णावर लक्ष ठेवणे आदी कामे करु शकणार आहे. या रोबोटची चाचणी घेतल्यानंतर त्याची कार्यक्षमता लक्षात घेत इतर रुग्णालयामध्येही अशाचप्रकारे रोबोटच्या मदतीने सामाजिक अंतर राखून वैद्यकीय सेवा देणे शक्य होईल आणि परिचारिका तसेच आरोग्य कर्मचारी यांचे कोरोनापासून रक्षण होण्यासाठी हा रोबो महत्वाची भूमिका बजावेल असे मत खासदार डॉ. श्रीकांत शिंदे यांनी व्यक्त केले.
यावेळी महापौर विनिता राणे, महापालिका आयुक्त डॉ. विजय सुर्यवंशी यांच्यासह पालिका प्रशासनाचे आरोग्य अधिकारी उपस्थित होते.
About Post Author
