कल्याण दि.8 जून :
कल्याण स्टेशन (पश्चिम)।परिसरात असणाऱ्या एटीएममधून चोरट्यानी तब्बल 49 लाख रुपयांची रोकड लंपास केल्याचा धक्कादायक प्रकार समोर आला आहे. विशेष म्हणजे एटीएम मशीनची कोणत्याही प्रकारे तोडफोड न करता अगदी पद्धतशीरपणे एवढी मोठी रक्कम लांबवल्याने आश्चर्य व्यक्त होत आहे.
कल्याण पश्चिमेला स्टेशन बाहेर अनेक बँकांची एटीएम मशिन्स आहेत. त्याठिकाणी 5 जून रोजी रात्रीच्या सुमारास हा प्रकार घडल्याचा प्राथमिक अंदाज आहे. दुसऱ्या दिवशी पैसे काढण्यासाठी दोघे जण या एटीएममध्ये गेले तेव्हा हा प्रकार उघड आला. याबाबत महात्मा फुले पोलीस ठाण्यात गुन्हा दाखल करण्यात आला आहे. याप्रकरणी महात्मा फुले पोलिसांनी संबंधित व्यक्तींची चौकशी आणि तपास सुरू केला आहे.
दरम्यान नेमक्या कोणत्या बँकेच्या एटीएममधून ही चोरी झाली आहे याबाबत माहिती मिळू शकली नाही.