कल्याण दि.10 जून :
कल्याणसह आसपासच्या शहरातून येणाऱ्या वाहनांनी कोन गावाऐवजी बाबगाव-सावद नाका या पर्यायी मार्गाचा अवलंब करण्याचे आवाहन कल्याण शहर वाहतूक पोलीस आणि कोनच्या सरपंचांनी केले आहे. रस्त्याच्या कामामुळे कल्याण – भिवंडी मार्गावर मोठ्या प्रमाणात वाहतूक कोंडी होत असून पुढील 15 दिवस या मार्गाऐवजी बाबगाव-सावद नाका हा पर्यायी मार्ग वापरण्याचे आवाहन करण्यात आले आहे.
कल्याण -शिळ आणि कल्याण -भिवंडी मार्गावर रस्ता रुंदीकरणाचे काम महिन्याभरापासून पुन्हा सुरू करण्यात आले आहे. त्यातच 2 दिवसांपूर्वी लॉकडाऊन शिथिल करण्यात आल्याने मोठ्या संख्येने लोकं कामावर जाण्यासाठी बाहेर पडत आहेत. आधीच रस्त्याचे काम आणि त्यात वाहनांची मोठी गर्दी यामुळे कोन गावासह दुर्गाडी चौक परिसरात मोठी वाहतूक कोंडी होत आहे. विशेष म्हणजे तासनतास ही वाहतूक कोंडी पाहायला मिळत असून अवघे 1 किलोमीटर अंतर कापायला 2 -2 तास लागत आहेत.
त्यामुळे पुढील काही दिवस वाहन चालकांनी या मार्गाएवजी पर्यायी मार्ग वापरण्याचे आवाहन कल्याण शहर वाहतूक शाखेचे वरिष्ठ निरीक्षक सुखदेव पाटील आणि कोन ग्रामपंचायतीच्या सरपंच रुपाली अमोल कराळे यांनी केले आहे.
तासनतास होणाऱ्या या वाहतूक कोंडीमुळे पेट्रोल आणि वेळेची हानी तर होतेच आहे. त्याचबरोबर कोन गाव आणि परिसरातील स्थानिकांच्या दैनंदिन व्यवहारावरही परिणाम होत असल्याची माहिती सरपंच रुपाली कराळे यांनी दिली.
तर सुज्ञ वाहन चालकांनी याठिकाणी वाहतूक कोंडीत अडकून पडण्याऐवजी बाबगाव-सावद नाका या पर्यायी मार्गाचा अवलंब करावा. जेणेकरून वाहनचालकांचा वेळ आणि पेट्रोल दोन्ही वाचेल असे आवाहन कल्याण शहर वाहतूक शाखेचे वरिष्ठ निरीक्षक सुखदेव पाटील यांनी केले आहे.
याठिकाणचा वाहनांचा ताण कमी झाल्यास रस्त्याचे कामही जलदगतीने होणार असल्याने पर्यायी मार्ग स्विकारण्याचे आवाहन करण्यात आले आहे.
About Post Author
