कोरोनाच्या पार्श्वभूमीवर कल्याणात शाळेचे ‘बंदिशाळेत’ (जेल) रूपांतर | LNN

कल्याण दि.31 मे :
कोरोनामूळे आपल्याला यापूर्वी कधीही न अनुभवलेले परिणाम पाहायला मिळत असून कल्याणातही असाच एक वेगळा प्रकार समोर आला आहे. कल्याणच्या आधारवाडी कारागृहातील(जेल) कैद्यांना कोरोनाची लागण होऊ नये म्हणून नविन कैद्यांची व्यवस्था एका शाळेमध्ये करण्यात आली आहे.
कोरोनाचा संसर्ग टाळण्यासाठी जेल प्रशासनाने खबरदारीचा उपाय म्हणून जेलजवळ असणाऱ्या शाळेत नविन कैद्यांना पाठवण्याचा निर्णय घेतला आहे.
राज्यातील इतर कारागृहांप्रमाणेच कल्याणच्या आधारवाडी कारागृहातही कैद्यांची लक्षणीय संख्या आहे. त्यातच शहरात घडणाऱ्या गुन्ह्यांतील नविन आरोपींची रवानगी कारागृहात केली जात आहे. मात्र या नव्या लोकांमुळे कारागृहातील कैद्यांना कोरोनाचा संसर्ग होण्याचा दाट धोका संभवतो. त्यामूळे नविन कैद्यांची व्यवस्था आधारवाडी जेलजवळील नामांकित डॉन बॉस्को या इंग्रजी शाळेमध्ये करण्यात आली आहे. या निर्णयामुळे संबंधित शाळेभोवती पोलिसांचा चोख बंदोबस्तही तैनात करण्यात आला आहे.