ठाणे दि.16 जून :
करोना साथीच्या मुकाबल्यासाठी ठाणे जिल्ह्याचे पालकमंत्री एकनाथ शिंदे यांच्या प्रयत्नाने ठाणे जिल्ह्याला राज्य सरकारने ३५ कोटी रुपयांचा निधी मंजूर केला आहे. यामध्ये ठाणे ५ कोटी, कल्याण-डोंबिवली महापालिका १० कोटी, नवी मुंबई महापालिका १० कोटी आणि मीरा-भाईंदर महापालिका १० कोटी यांचा समावेश आहे. संपूर्ण कोकण विभागासाठी १०९ कोटी रुपये मंजूर करण्यात आले असून औरंगाबाद विभागासाठी २० कोटी रुपये शासनाने मंजूर केले आहेत. अशा एकूण१२९ कोटी रुपयांपैकी सर्वाधिक ३५ कोटी रुपये ठाणे जिल्ह्यासाठी मंजूर झाले आहेत.
ठाण्यासह संपूर्ण एमएमआर परिसरात करोना साथीला अटकाव करण्यासाठी प्रशासन प्रयत्नांची पराकाष्ठा करत असून आरोग्य व्यवस्था बळकट करण्याचे काम मोठ्या प्रमाणावर सुरू आहे. त्यासाठी निधीची आवश्यकता असून राज्याच्या आपत्कालीन प्रतिसाद निधीतून तो उपलब्ध करून देण्याची मागणी ठाणे जिल्हा पालकमंत्री एकनाथ शिंदे यांनी केली होती. त्यानुसार या वाढीव निधीला मंजुरी देण्यात आली. यामुळे करोनाविरोधातील लढ्याला आणखी बळ मिळेल, असा विश्वास व्यक्त करून शिंदे यांनी मुख्यमंत्री उद्धव ठाकरे यांचे आभार मानले आहेत.
तर कल्याण-डोंबिवली महापालिका हद्दीत करोनाबाधितांची वाढती संख्या लक्षात घेता येथे प्रभावी मुकाबल्यासाठी वाढीव निधी मिळण्यासाठी खासदार या नात्याने आपण प्रयत्न केले होते असे सांगत कल्याण डोंबिवलीतील वाढत्या कोरोनाला रोखण्यासाठी या निधीची मोठी मदत होईल असा विश्वास खासदार डॉ. श्रीकांत शिंदे यांनी व्यक्त केला आहे.