मुंबई दि. 27 मे :
क्रेडाई-एमसीएचआयने प्रश्नावलीच्या माध्यमातून ५०० सदस्यांच्या माहितीच्या आधाराने अहवाल प्रकाशित केला असून लॉकडाऊननंतर रिअल इस्टेटचा व्यवसाय सामान्य होण्यासाठी 9 ते 12 महिन्यांचा कालावधी लागेल असे मत व्यक्त करण्यात आले आहे. तर केवळ ३० टक्के विकासकांच्या मते 6 महिन्यांत व्यवसाय सामान्य होण्याचा अंदाज वर्तवला आहे.
नोटाबंदी, रेरा, जीएसटी अशा अनेक संकटांना रिअल इस्टेट तोंड देत असतांना कोविड-१९ ने डोके वर काढले आणि इतर व्यवसायाबरोबर बांधकाम व्यावसायिकांचेही कंबरडे मोडले. पण तरीही ८३ टक्के व्यावसायिक आपला व्यवसाय न बदलता बांधकामात राहू इच्छितात असं या अहवालावरून समजते. क्रेडाई-एमसीएचआयचे अध्यक्ष नयन शाह म्हणाले की, “रिअल इस्टेट उद्योग भारतातील इतर उद्योगांप्रमाणेच स्वतःच्या अस्तित्वासाठी झगडत आहे, त्यामुळे हा एक महत्त्वपूर्ण संशोधन अहवाल मानला पाहिजे. या सर्वेक्षणानुसार सध्याच्या कठीण परिस्थितीतही ८३ टक्के विकासकांनी आपल्या उद्योगाशी दृढता आणि आत्मविश्वास दाखवून याच व्यवसायात कायम राहत पुढे जाणे पसंत केले आहे. तर योग्य किंमत मिळाल्यास, जवळजवळ 50% विकसकांनी नवीन मालमत्ता संपादित करण्याची तयारी आणि 2021 पर्यंत निवासी क्षेत्रात प्रकल्प सुरू करण्याची इच्छाही दर्शवली आहे.
भविष्यातील प्रकल्पांमध्ये WHF विचारात घेऊन डिझाइनमध्ये बदल घडवणे बंधनकारक असेल, पण काही विकसक सध्या सुरू असलेल्या प्रकल्पांतून प्रयत्न करण्यासाठी उत्सुक आहेत.” साइटवरील कामगार आणि कुशल कारागिरांची कमतरता असूनही बरेच विकासक आपला प्रकल्प कसा पूर्ण होईल याकडे लक्ष केंद्रित करतांना दिसत आहेत. या सर्व्हेमध्ये आणखी एक विशेष गोष्ट समोर आली आहे. ती म्हणजे ९५ टक्के विकासक अत्यावश्यक वस्तू क्षेत्रात (Essential commodities sector) किंवा करमणूकीसारख्या क्षेत्रामध्येही आपला व्यवसाय वाढविण्याचा प्रयत्न करत आहेत.
धोरणात्मक विकासक प्रकल्पांसाठी एकमेकांना एकत्रित करण्याचा आणि भागीदारी करण्याचा प्रयत्न करीत आहेत आणि पुरवठादार आणि विक्रेते शोधत आहेत. या संशोधन अहवालात अनेक आर्थिक, सरकारशी संबंधित, कामगारांशी संबंधित, प्रकल्प पूर्ण करणे आणि ग्राहकांशी संबंधित मुद्दे नमूद करण्यात आले आहेत. तर काही विकासक एक धोरणात्मक पवित्रा घेत एकमेकांच्या सहकार्याने आणि भागिदारी करत प्रकल्प करतांना दिसत आहेत. तसेच ते बार्टर एग्रिमेंट करू शकतील अशा सप्लायर्स आणि व्हेंडर्सना प्राधान्य देत आहेत.
महाराष्ट्र चेंबर ऑफ हाऊसिंग इंडस्ट्रीची (क्रेडाइ-एमसीएचआय) स्थापना १९८२ साली झाली. मुंबई आणि मुंबई महानगर क्षेत्रातील ही प्रमुख आणि मान्यताप्राप्त संघटना आहे. बांधकाम विकास क्षेत्रात काम करणाऱ्या व्यावसायिकांना क्रेडाइ-एमसीएचआयने एका व्यासपीठावर आणून या उद्योगाला भेडसावणाऱ्या समस्यांचे निराकरण करते. मुंबईतील १ हजार ८०० अग्रगण्य विकासकांच्या सदस्यत्वासह क्रेडाइ-एमसीएचआयने मुंबई महानगर क्षेत्रातही विस्तार केला असून, ठाणे, कल्याण-डोंबिवली, मिरा-विरार शहर, रायगड आणि नवी मुंबई येथे संघटनेची कार्यालये आहेत. मुंबई आणि मुंबई महानगर क्षेत्रातील निवासी व व्यापारी मालमत्तांच्या संघटित विकासकामांपैकी ८० टक्के कामांचे विकासक क्रेडाइ-एमसीएचआयचे सदस्य आहेत.
About Post Author
