कल्याण दि.31 मे :
सध्या जगभरात थैमान घालणाऱ्या कोरोनाचा संसर्ग सिगारेट, गुटखा आणि तंबाखूचे सेवन करणाऱ्यांना अधिक असल्याची माहिती कल्याणातील नामांकित दंतचिकित्सक डॉ. चंद्रशेखर तांबडे यांनी दिली. आज असणाऱ्या ‘जागतिक तंबाखू विरोधी दिनानिमित्त (वर्ल्ड नो टोबॅको डे) त्यांनी एलएनएनशी संवाद साधला.
तरुण पिढीबरोबरच इतर वयाच्या लोकांचा सिगारेट आणि तंबाखू सेवनाकडे वाढता कल पाहता 31 मे 1987 रोजी जागतिक आरोग्य संघटनेने 31 मे हा ‘जागतिक तंबाखू विरोधी दिन (वर्ल्ड नो टोबॅको डे) घोषित केला. तर आपल्या देशातील लोकांना तंबाखूचे व्यसन हे पोर्तुगीजांमूळे लागल्याचे सांगत तब्बल 400 वर्षांपूर्वी पोर्तुगीजांनी हा पदार्थ आपल्याकडे आणल्याची माहिती डॉ. तांबडे यांनी दिली. आपल्याकडे मुख्यत्वेकरून सिगारेट, गुटखा आणि तंबाखुजन्य पदार्थांद्वारे त्याचे सेवन केले जाते. ज्यामध्ये सिगारेटमूळे होणाऱ्या आजारांचे प्रमाण सर्वाधिक आहे. सिगारेटच्या सतत सेवनाने फुफ्फुसांशी संबंधित आजार उद्भवतात. ज्यामुळे आपली फुफ्फुसे निकामी होतात. सिगारेट पिणाऱ्या प्रत्येक व्यक्तीमध्ये हा आजार थोड्याफार प्रमाणात असतो. अशी फुफ्फुसे निकामी झालेल्या व्यक्तींना कोरोनाचा संसर्ग होण्याचा धोका हा सर्वात जास्त असल्याचे मत डॉ. तांबडे यांनी यावेळी व्यक्त केले.
तर सिगारेट, तंबाखू सेवनानंतर गुटखा खाण्याच्या सवयीमूळे तोंडाच्या कर्करोगाचे प्रमाण सर्वाधिक असून अशा लोकांनी वेळीच यावर उपचार घेणे गरजेचे आहे. तोंडाचा कर्करोग हा एकाच दिवसात होत नाही. तोंडात पुळी येणे, तोंड कमी उघडणे, दातांच्या खाली हिरड्याना सूज येणे आदी त्रासांची लक्षणं सुरुवातीला दिसून येतात.
कॅन्सरमुळे जगभरात दर तासाला 5 लोकांचा मृत्यू होत असून लोकांनी वेळीच या व्यसनांपासून दूर जाणे आवश्यक आहे. अन्यथा सध्याच्या कोरोनाच्या काळात अशा लोकांना प्रादुर्भाव होण्याची शक्यता अधिक असल्याचे डॉ. चंद्रशेखर तांबडे यांनी यावेळी सांगितले. त्यामूळे आजच्या दिवसाचे औचित्य साधून तरुण वर्ग आणि इतरांनीही कोणत्याही प्रकारचे व्यसन न करण्याची शपथ घेण्याचे आवाहनही त्यांनी यावेळी केले आहे.
About Post Author
